D. Castelar Piedra Pérez

Nace na  parroquia de San Xoán de Tabagón no Concello do Rosal no ano 1930, no seo dunha familia de grande tradición musical, sendo fillo do director da antiga Banda de Tabagón, D. Pablo Piedra González. A idade de 10 anos, da man do seu pai, iníciase na música e aos 13 años ingresa na Banda de Tabagón como saxofón barítono, onde permanece ata os 21 anos, cando ten que trasladarse ao Ferrol para realizar o servizo militar, ingresando entón na Banda de Música do Rexemento Mérida 44 de Infantería.

De regreso do servizo militar, incorpórase novamente á Banda de Tabagón ata o ano 1963, actividade que alternaría co oficio de canteiro e albanel. En 1965 por motivos de traballo, trasládase a Valladolid, traballando primeiro de capataz nunha empresa construtora e posteriormente como empresario no sector da construción.

Durante case corenta anos, Castelar non desenvolve actividade musical ata a súa xubilación, cando retoma o saxofón barítono na Escola de Música Municipal de Valladolid, onde estuda saxofón e forma parte de diversos conxuntos instrumentais da Escola de Música. Posteriormente pasa a formar parte das Bandas de Música de Laguna de Duero e da Banda de Música de La Flecha. En 2003 retorna a Galicia e dende entón forma parte da Banda de Música Agrupación Musical da Guarda.