ACTIVIDADES 2010

VIAXE A LOUSAME:

           Como en anos anteriores o pasado verán a Agrupación Musical de A Guarda realizou unha viaxe de intercambio, nesta ocasión coa Banda Municipal de Lousame (A Coruña). A nosa banda partiu o sábado 31 de xullo ás 8 da mañá do local de ensaios para facer unha parada na Proba do Caramiñal. Durante o día visitaron tamén  as dunas de Corrubedo e a praia do Vilar para, a continuación, coñecer o Castro de Baroña en Porto do Son. A última hora da tarde chegaron a Noia onde foron recibidos polo Director e algúns músicos da Banda de Lousame.

                                 Compoñentes da Agrupación en Noia

                      

                      O domingo dia 1 de agosto pola mañá tiveron ocasión de visitar  o casco histórico de Noia.     Despois de comer saíron  cara a Lousame para participar no Festival de Bandas de Música de Lousame onde compartiron escenario coa banda anfitrioa e coa Banda de Musica Municipal de Vilalba (Lugo).  

                     Ao remate do festival que se realizou a carón do concello de Lousame, procedeuse á entrega de agasallos por parte das bandas participantes e representantes do Concello de Lousame e como broche final á convivencia musical coa Banda de Musica Municipal de Lousame os nosos músicos acudiron a unha cea  invitados polos nosos anfitrións, saíndo cara a Guarda ó remate da mesma.

                                A Banda durante a súa actuación en Lousame

NOVA SECCIÓN INFANTIL

A Agrupación Musical de A Guarda ten unha sección infantil á que poden acudir todos aqueles rapaces e rapazas que o desexen, para aprender a tocar en conxunto. Poden vir a probar durante dous meses sen compromiso e máis adiante formar parte da Banda se o desexan. Para máis información poden poñerse en contacto con nós no seguinte enderezo:

agrupacionmusicaldaguarda@hotmail.com
 

V FESTIVAL DE BANDAS DE MÚSICA "VILA DA GUARDA"

                                Agrupación Musical de A Guarda                    * Fotografía de Lalo Rodríguez

O 27 de agosto tivo lugar na Praza de San Bieito o “V Festival de Bandas de Música Vila da Guarda” organizado pola Agrupación Musical de A Guarda. Este ano participaron como bandas invitadas a Banda  de Música "Unión Musical de Coruxo" e a Banda de Música do Concello de Barbadás;  en último lugar actuou a Agrupación Musical da Guarda. O bo tempo contribuíu a que unha boa cantidade de público se mantivera nas gradas ata ó final do evento apoiando ás distintas formacións musicais.  O evento estivo presentado nesta ocasión por Elena Baz (Xamaraina), a quen agradecemos a súa colaboración.

O programa foi o seguinte:

UNIÓN MUSICAL DE CORUXO:

1 - Orpheo en los Infiernos...............................J. Offenbach

2 - Concerto d’amore....................................Jacob de Haan

3 – El diablo de madera.....................................Harm Evers

4 – Certámen Levantino...........................Pascual Marquina

DIRECTOR: Francisco Abal Rosales

BANDA DE MÚSICA DO CONCELLO DE BARBADÁS:

1 - Cultura....................................................Pérez Outeiriño

2 – Poeta y aldeano..........................................F. von Suppé

3 – A lenda de Montelongo.........................Bernardo del Río

4 – Tom Jones in concert.....................Arr. Frank Bernaerts

5 – Muiñeira dos Pendellos......................Juan Lois Diéguez

DIRECTOR: José Manuel Dopazo Grande

AGRUPACIÓN MUSICAL DE A GUARDA:

1 – La Primitiva (pasodoble)...............................Jef Penders

2 – Virginia....................................................Jacob de Haan

3 – Amapola....................................................J. Mª  la Calle

                                                                   Arr. Naohiro Inai

4 – Caravan.....................................Duke Ellington/ J. Tizol

                                                                   Arr. Naohiro Inai

5 – SanLorenzo de Muimenta.........................X. L. Represas

DIRECTOR: Víctor Luís Alonso Treinta

Ó remate da actuación da banda local houbo procedeuse á entrega duns agasallos ás bandas por parte da organización e do Concelleiro de Cultura.  Seguidamente sorteouse un lote de produtos entre o público asistente e como broche final ás tres bandas interpretaron unhas pezas en conxunto.

Agradecemos a colaboración do Concello da Guarda, da Deputación, da Federación Galega de Bandas de Música, de “La Caixa” e a de todos os establecementos, empresas e particulares que  nos axudaron economicamente, xa que sen eles non sería posible a realización deste Festival.

Moitas grazas a todos e ata o ano que ven.

         Os tres directores ó remate da actuación

V Festival de Bandas de Música "Vila da Guarda"

ASEMBLEA XERAL ORDINARIA 2011

A Xunta Directiva da Agrupación Musical da Guarda convoca aos seus socios e socias á Asemblea Xeral Ordinaria, que terá a seguinte orde do día:

    - 1. Lectura e aprobación, se procede, da acta anterior

    - 2. Estado de contas a 31/12/10 

    - 3. Actividades previstas para o ano 2011 

    - 4. Novos socios

     - 5. Renovación parcial da Xunta Directiva

     - 6. Rogos e preguntas

Lugar: local de ensaios da Banda 

Data: o día 19 de febreiro de 2011 

Hora: ás 19:00 horas en primeira convocatoria e as 19:30 en segunda convocatoria 

IV CERTAME GALEGO DE BANDAS DE MÚSICA

En Santiago, no Auditorio de Galicia, tivo lugar o pasado 19 de novembro o IV Certame de Bandas de Música. A nosa Agrupación participou por primeira vez neste evento, a pesar do pouco tempo de que dispuxeron para preparar as obras (tan só un mes) e co noso director Víctor aínda afastado das súas funcións polo accidente que sufrira o pasado verán. Da man do director substituto Francisco Abal Rosales, traballaron duro e acadaron o cuarto premio na terceira categoría. As obras interpretadas foron: "Agüero" de J. Franco como pasodobre de presentación, "Auga levada" de Juan Manuel Eiras Tojo (obra obrigada) e como obra libre a banda interpretou "RobinsonCrusoe" de Bert Appermont.

Os nosos parabéns a  tódolos compoñentes da banda e ánimo que ides moi ben.

 Momento no que interpretaron "Robinson Crusoe"

X Certame Provincial de Bandas de Música

O día 2 de outubro celebrouse en Pontevedra o X Certame Provincial de Bandas de Música da Deputación, no que participou a Agrupación Musical de A Guarda na 3ª categoria (ata 45 músicos).
Este ano a obra obrigada foi "Retrincos" de David Fiuza e como obra libre a banda interpretou "Robinson Crusoe" de Bert Appermont; o pasodobre de presentación foi "Agüero" de J. Franco
A Agrupación estivo dirixida por Francisco Abal Rosales que substituiu ó noso director Víctor que aínda non se recuperou das súas lesións. A Agrupación Musical de A Guarda acadou nesta edición o 3º premio.
A xunta directiva quere felicitar a tódolos compoñentes da banda polo logro e agradecerlles o esforzo realizado no último mes para preparar as obras con tan pouco tempo de antelación.

 Momento no que interpretaron "Peito de lobo", o 3º tempo da obra "Retrincos":